Dous artigos de persoal investigador do IIS Galicia Sur premiados pola Sociedade Española de Reumatoloxía

• O traballo de Irene Altabás propón o protocolo LLDAS como unha ferramenta máis estrita para a valoración da actividade do lupus

• No artigo dirixido por Samuel García Pérez se identifica a proteína Semaforina3B como unha nova opción terapéutica para o tratamento da artrite reumatoide

Vigo, 12 de maio de 2023.- Irene Altabás González, médica reumatóloga, e Samuel García Pérez, doutor en Bioloxía Molecular e Biotecnoloxía, foron premiados pola Sociedade Española de Reumatoloxía (SER) por senllos artigos publicados en 2022 e que están relacionados co traballo de investigación que ambos desenvolven no Grupo de Reumatoloxía e Enfermidades Inmuno-mediadas ‘IRIDIS’, do Instituto de Investigación Sanitaria Galicia Sur.

Protocolo máis estrito

No caso da doutora Altabás, o galardón obtido foi o Premio SER 2023 ao Mellor Traballo en Lupus Eritematoso Sistémico correspondente ao seu artigo: Does expert opinion match the definition of lupus low disease activity state? Prospective analysis of 500 patients from a Spanish multicentre cohort, publicado en Rheumatology (Oxford). No devandito artigo, a premiada aborda o traballo sobre novas estratexias de manexo dos pacientes con lupus mediante un modelo treat to target ou tratamento por obxectivos. Nesta estratexia treat to target o obxectivo é que o paciente estea en remisión clínica, ou, se non é posible, en baixa actividade da enfermidade, xa que se demostrou que se o paciente alcanza estes estados clínicos resulta nunha melloría en diferentes desenlaces a longo prazo (menos brotes, menos dano, mellores índices de calidade de vida…).

Con todo, segundo o artigo de Irene Altabás, é necesario “non subestimar a actividade da enfermidade, considerando a pacientes en remisión ou baixa actividade cando non cumpren a definición de LLDAS. O LLDAS é unha ferramenta máis estrita que o xuízo clínico do médico para a valoración da actividade do lupus e é recomendable usala en práctica clínica”.

Este traballo forma parte da tese doutoral de Irene Altabás González, que dirixe o doutor José María Pego Reigosa, líder do Grupo de Reumatoloxía e Enfermidades Inmuno-mediadas ‘IRIDIS’, do IISGS; titulada: Achegas á caracterización do estado de baixa actividade do lupus eritematoso sistémico que está a realizar na universidade de Vigo e que defenderá o próximo mes de xuño.

Este traballo foi financiado por un proxecto do ISCIII: PI17/01366.

Nova opción

O Premio SER 2023 ao Mellor Traballo en Ciencia Básica foille outorgado ao traballo dirixido por Samuel García Pérez, polo artigo Central Role of Semaphorin 3B in a Serum-Induced Arthritis Model and Reduced Levels in Patients With Rheumatoid Arthritis, publicado en Arthritis and Rheumatology. Neste traballo, identifícase a proteína Semaforina 3B como unha nova opción terapéutica para o tratamento da artrite reumatoide xa que a súa administración reduciu a inflamación articular nun modelo múrido de artrite. Ademais de Samuel García, investigador Miguel Servet e responsable da Unidade de Reumatoloxía e Inmunología Traslacional do Grupo Reumatoloxía e Enfermidades Inmuno-mediadas ‘IRIDIS’ do IISGS, nel tamén participou o doutor José María Pego Reigosa, investigador responsable do devandito grupo; ademais dos seus tamén membros: Sara Martínez Ramos, Carlos Rafael Vidal e Beatriz Malvar Fernández. Doutra banda, tamén colaboraron a doutora África González, investigadora responsable do Grupo Inmunoloxía do IISGS e Andrea Fernández-Carrera, do mesmo grupo.

Este traballo foi financiado por un proxecto do Instituto de Saúde Carlos III (PI20/01472).

Os premios foron entregados o pasado 11 de maio, con motivo da celebración do Congreso Anual da Sociedade Española de Reumatoloxía en Sevilla.

VER NOTICIA