• O grupo de Patoloxía Dixestiva do IIS Galicia Sur elabora vídeos para que os pacientes coñezan estas enfermidades e poidan realizar autocuidados
• O proxecto de investigación conta con financiamento do IS Carlos III
A aplicación das novas tecnoloxías ao servizo dos pacientes con Enfermidades Inflamatorias Intestinais. É o proxecto no que traballan os integrantes do grupo de Patoloxía Dixestiva do IIS Galicia Sur e da Unidade de EII da Área Sanitaria de Vigo, en colaboración con enxeñeiros de telecomunicacións da Universidade de Vigo.
O proxecto está financiado polo Instituto de Salud Carlos III (PI20/01664) e xurdiu da observación da falta de adherencia aos tratamentos en polo menos un 30% de pacientes con esta patoloxía.
A coordinadora da Unidade de EII, María Luisa de Castro, sinala que “esta circunstancia supón un risco para os pacientes que non seguen as pautas que lles damos para os seus tratamentos” e engade: “O futuro destas enfermidades crónicas é engadir ao paciente ao seu propio coidado”. Para iso é fundamental que o enfermo coñeza a patoloxía que ten e poida concienciarse diso
Así xurdiu o proxecto de investigación, que consiste na elaboración de vídeos duns tres minutos de duración que serán postos ao dispor do enfermo e que explicarán os motivos polos que se produce a enfermidade, os síntomas e os tratamentos que se utilizan. Ademais farán itinerarios específicos para tipo de paciente.
Na actualidade, hai 1.500 pacientes con EII en seguimento na Área Sanitaria de Vigo.
Visita nuestras redes sociales